Norðurlendskt samstarv um vaksinugransking

Føroysku løgtingsumboðini í Norðurlandaráðnum, Johan Dahl og Erling Eidesgaard, heita á løgtingið um at taka undir við 45 tilráðingum, sum Norðurlandaráðið samtykti í fjør.

Hetta eru tilmæli til stjórnirnar í londunum um at virka fyri, at endamálini við tilráðingunum verða rokkin.

Eitt tilmæli er um, at stjórnirnar í limalondunum taka stig til felags norðurlendskt samstarv um at framleiða koppingarevni, og at peningur verður settur av til vaksinugransking.

Fýra tilráðingar frá Útnorðurráðnum

Føroysku umboðini í Útnorðurráðnum biðja eisini tingið um at taka undir við tilráðingunum, sum Útnorðurráðið samtykti í fjør.

Tilráðingarnar vórðu samtyktar á ársfundi í Nuuk í august.Talan er um fýra tilráðingar.

Mælt verður millum annað til, at ráðharrar og landsstýrisfólk, ið hava ungdómin sum málsøki, hittast í ár at tosa um royndir, og samanbera kanningar og dátur, hvussu ungdómurin hevur tað, tá ið ræður um trivnað, heilsu, frítíðarítriv, sosialar miðlar og onnur viðkomandi evni. 

Jenis av Rana, Breddin

Jenis av Rana er næstformaður í Útnorðurráðnum. (Mynd: Bjarni Árting Rubeksen)

2,2 mió. kr. í limagjaldi

Limalomdini í Útnorðurráðnum rinda tilsamans 2,2 milliónir krónur í limagjaldi í ár.

Ísland rindar helvtina, ella eina millión og 106.000 krónur. Føroyar og Grønland rinda 553.197 krónur í part.

Formansskapurin í Útnorðurráðnum góðtók áseting av limagjaldi fyri 2023 á ársfundinum í Nuuk í fjør.

Føroysku umboðini í Útnorðurráðnum eru Henrik Old, Erling Eidesgaard, Karlot Hergerisson, Jenis av Rana, Bárður á Lakjuni og Eyðdis Hartmann Niclasen.

Steinunn Tóra Árnadóttir úr Íslandi er formaður í Útnorðurráðnum.

Jenis av Rana er fyrsti næstformaður.