Tøkugjaldið fer at geva 66 milliónir meira í ár

Inntøkan hjá landskassanum verður tann sama sambært uppskotinum um tøkugjald frá alivinnuni, sum kom í løgtingið í gjár.

Inntøkan er eisini tann sama sum í uppskotinum, sum var til hoyringar.

Eftir nýggju skipanini fær landið slakar 490 mió.kr. í tøkugjaldi í ár, slakar 213 mió.kr. meira enn í galdandi lóg.

Men nýggja gjaldið skal ikki koma fyrr enn 1.august, so meirinntøkan í ár verður slakar 89 mió. kr.

Men nettoinntøkan verður tó stívar 66 mió. kr., tí partafelagsskatturin og vinningsbýtisskatturin minka.

Fyrsta viðgerð verður fríggjadagin.