Politiskt friðskjól í Íslandi: Fáa pening fyri at fara av landinum

Íslendski løgmálaráðharrin, Jón Gunnarsson, ætlar at rinda teimum, sum hava biðið um politiskt friðskjól, 3.000 evrur, ella  góðar 22.000 krónur, um tey sjálvboðin fara úr Íslandi, áðrenn tíðin, sum tey hava fingið uppihaldsloyvi í Íslandi, er farin.

Og umsøkjarin kann fáa upp í 1.000 evrur aftrat, um farið verður úr Íslandi fyri evstamark.

Er talan um barn, sum ongan hevur við sær, er upphæddin 1.500 evrur,  góðar 11.000 krónur, og eyka ískoytið er 500 evrur, 3.700 krónur. 

Ráðharrin sigur í viðmerkingum til uppskotið, at endamálið er m.a. at sleppa undan dýrum løgreglufylgi, tá ið útlendingarnir verða vístir av landinum. 

- Við hesi skipan fer íslendski landskassin at spara nógvar pengar, sigur Jón Gunnarsson í grundgevingini.

Skipanin hevur fyrr verið í gildi í Íslandi fyri asylumsøkjarar, sum biðja um at sleppa av landinum.