Oljuavgjaldið verður ikki strikað á hesum sinni

Samgongan og Sambandsflokkurin vilja ikki strika oljuavgjaldið, soleiðis sum Miðflokkurin mælir til.

Meirilutin í Fíggjarnevndini heldur, at onnur átøk, sum skula hjálpa fólki, muna betur og raka rættari, eitt nú hjálparpakkin, sum bleiv samtyktur fyrr í ár, og ætlaði skattalættin og lønarlyftið.

Landskassin missir 70 mió. kr., um oljuavgjaldið verður strikað, sigur meirilutin í álitinum hjá fíggjarnevndini.

Hann heldur, at tað heldur ikki er í samsvari við veðurlagspolitikkin at betra um kappingarstøðuna hjá einum lívrunnum, fossilum brennievni.

Fólkaflokkurin tekur undir við Miðflokkinum.

Teir hava tó eitt broytingaruppskot um at broyta oljuavgjaldið á slíkan hátt, at tað sjálvvirkandi verður lagt upp fyri prísgongdini.