Næstan 2000 næmingar luttóku á Skúlaleikum 2023

Í gjár var endabrestur á ársins Skúlaleikum, tá 15 flokkar hittust til á Hálsi í Havn. Seks ítróttagreinar vóru á skrá: Frælsur ítróttur, flogbóltur, badminton, inniróður, kurvabóltur og rørslumegi.

Næstan 2000 næmingar úr 4., 5. og 6. flokkum kring alt landið hava tikið lut í Skúlaleikum hetta skúlaárið, skrivar Ítróttasamband Føroya.

Kurvabóltur var - saman við rørslumegi - við fyri fyrstu ferð, og Súsanna Mørk, sum hevur undirvíst í kurvabólti á Skúlaleikum í ár, vónar, at hetta kann eggja børnum at spæla kurvabólt í frítíðini.

 - Tað hevði verið tað feitasta, um fleiri komu afturat. Vit hava vaksandi feløg í Havn í hvussu er, og at fáa bygdabørnini við hevði verið uppaftur betri, sigur Súsanna Mørk.

Børnini høvdu eftir øllum at døma ein stuttligan dag á Hálsi, men Sigrid Bech Nolsøe og Vera Alstrup Vang úr Skúlanum av Fløtum iðraðu seg um, at tað ikki eydnaðist at vinna leikirnar.

 - Tað gekk okey, men vit eru eitt sindur keddar um, at vit ikki vunnu, søgdu tær.

Hetta er annað árið, at Skúlaleikir eru, og sambært Katrini á Neystabø verða teir aftur í sama líki komandi skúlaár. Eisini verður arbeitt við at bjóða hádeild og innskúling okkurt, men enn er ikki greitt, júst hvussu tað tilboðið fer at síggja út.