Meirilutin heldur fast um heitið løgkvinna

Meirilutin í grein 25-nevndini, sum viðgjørdi uppskotið um starvsheitini í landsstýrinum og løgtinginum, heldur fast um heitið løgkvinna, tí maður á nútíðarføroyskum merkir mannfólk og ikki menniskja.

Í meirilutanum eru umboðini hjá samgonguni og Sambandsflokkinum.

Nakað av iva hevur verið um heitið løgkvinna og varaløgkvinna.

Sagt verður, at løgmaður verður mett sum eitt heiti við longri søguligari tyngd enn hini heitini og sipar til embætið sjálvt, sama um kvinna ella maður er í embætinum. 

Minnilutin, Fólkaflokkurin og Miðflokkurin, hevur eitt broytingaruppskot um, at orðið løgtingsfólk rúmar bæði kynini.

Tað er, at heitið løgtingsfólk og landsstýrisfólk verður bara brúkt um ein bólk ella einstakt fólk, men ikki sum starvsheiti.

Allir flokkar taka annars undir við uppskotinum hjá formansskapinum um at broyta stýriskipanarlógina og tingskipanina. 

Alt álitið kann lesast her.