Fiskirættindi skulu ikki enda á ov fáum hondum

Kannað verður nú, um, og tá hvussu, sleppast kann undan, at rætturin at fiska ikki endar á ov fáum hondum.

Hetta stendur í samgonguskjalinum, og sjófeingislógin verður nú endurskoðað, sigur Dennis Holm, landsstýrismaður, í svari til Erhard Joensen, løgtingsmann.

Støða verður síðani tikin til, um, og møguliga hvørjar tillagingar, hóskandi skulu gerast, sigur landsstýrismaðurin.

Hann svarar eisini, at ískoytiskvoturnar av svartkjafti, norðhavssild og makreli kundu vera lagdar um til egnar kvotur í fjør.

Erhard Joensen

Erhard Joensen, løgtingsmaður, spurdi landsstýrismannin í fiskivinnumálum um betri rakstrargrundarlag til smáu aktørarnar í uppsjóvarvinnuni.

Fýra umsóknir játtaðar

Men kvoturnar til vinnuligar royndir og verkætlanir og til ítøkilig skipakeyp kunnu vera umlagdar í ár.

Fýra umsóknir um ískoytiskvotur eru játtaðar, og kvoturnar eru umlagdar.

Tvær umsóknir eru ikki eru gingnar á møti. Og umsókn frá einum skipi verður viðgjørd í løtuni.

Eitt felag, sum fekk kvotu til vinnuligar royndir og verkætlanir á landi, søkti um umlegging, men fekk nei úr Fiskimálaráðnum.