EUROVISION: Føroyskir viðmerkjarar til seinnu hálvfinaluna

Tað er í kvøld, at seinna hálvfinalan í Eurovision-sangkappingini fer av bakkastokki í Liverpool Arena.

Og tað er eisini í kvøld, at føroyski Rani Petersen, kendur sum Reiley, fer á pallin við sanginum "Breaking my Heart".

Kringvarpið sendir seinnu hálvfinaluna, og føroyingar kunnu fylgja við, meðan Gunnar Nolsøe og Siri Súsonnudóttir Hansen fara at siga frá.  

Danskir undirtekstir verða vístir, tá ið vertirnir tosa á enskum. 

Sum nakað nýtt kunnu fólk úr øllum heiminum gera sína atkvøðu galdandi í ársins Eurovision-sangkapping. 

Men sambært reglunum í sangkappingini kunnu fólk, sum eru stødd í Føroyum ella í Danmark, ikki atkvøða fyri Reiley, sum umboðar Danmark í Eurovision.

Tað ber til at atkvøða á heimasíðu, við SMS ella við at taka niður Eurovision-appina. Tú kanst lesa meira um reglurnar fyri atkvøðugreiðslu til ársins Eurovision her.