Færri treytir um skannaran

Tað er bara ein treyt eftir í tilboðnum frá vinnufyritøkunum í Norðoyggjum og Eysturoynni um at lata ein skannara til Klaksvíkar Sjúkrahús.

Og tann treytin er, at skannarin skal standa á Klaksvíkar Sjúkrahúsi.

Mánadagin boðaðu vinnufyritøkurnar sjúkrahúsverkinum frá, at tey broyta treytirnar. Hetta var gjørt við brævi frá Peturi Even Djurhuus, advokati. Hann sigur í brævinum, at gávulatararnir hava gjørt av at broyta treytirnar, eftir at tað er staðin so mikil tvídráttur um skannaran.

Í upprunaligu treytunum varð kravt, at um Klaksvíkar Sjúkrahús vil skifta MR skannaran út, so skal restvirðið kunna nýtast sum heilt ella partvíst gjald fyri annað tól, sum so eisini skal vera á Klaksvíkar Sjúkrahúsi og brúkast har.

Hendan treytin er slept.

Treytin um, at sjúkrahúsverkið skal binda seg til at veita rakstrarfígging til nýtslu av skannaranum, er eisini slept. 

Gávulatararnir hava framvegis eitt ynski um, at privat skulu sleppa fram at skannaranum, tá ið sjúkrahúsverkið ikki brúkar hann.

Í løtuni sita fakfólk í sjúkrahúsverkinum og skriva eitt tilmæli til teir tríggjar stjórarnar í Sjúkrahúsverki Føroya um, hvat skal gerast við hetta tilboðið.

Síðani skal sjúkrahúsleiðslan skriva eitt tilmæli til Margit Stóra, landsstýriskvinnu. Hetta tilmælið skal vera liðugt 25. mai.