Bústaðir yvirtaka bústaðarbygging í Fuglafirði

Almenna felagið Bústaðir skal standa fyri nógv umrøddu íbúðarbyggingini í Fuglafirði.

Tað boðar Fuglafjarðar kommuna frá.

Bústaðir, smápartafelagið "Toftanes 2" við Eyðfinni Reyðberg og Fuglafjarðar kommuna hava gjørt avtalu um, at Bústaðir yvirtaka verkætlanina frá Toftanes 2, ið fevnir um 18 leiguíbúðir, sum skulu byggjast á matr. nr. 769b í Fuglafjarðar kommunu. 

TN-bygging verður høvuðsarbeiðstakari

Sambært kommununi merkir tað, at Bústaðir yvirteka byggingina av leiguíbúðunum frá "Toftanes 2". Avtalað er eisini, at arbeiðið verður gjørt liðugt við TN-bygging sum høvuðsarbeiðstakara. Tað er sama felag, sum upprunaliga skuldi byggja íbúðirnar.

Broyttu fortreytirnar merkja eisini, at fólk, 60 ár ella eldri, sum eru á bíðilista hjá Bústøðum, hava fyrsta rætt at fáa tilboð um seks av teimum 18 íbúðunum. 

Hinar 12 íbúðirnar verða lutaðar út eftir vanliga bíðilistanum hjá Bústøðum.

Sambært Fuglafjarðar kommunu skal kommunan rinda 900.000 krónur til smápartafelagið "Toftanes 2" fyri at enda alt samstarv og allar bindingar partanna millum.