Hoyvíkingar fáa egið valstað - hestfólk kunnu atkvøða við brævi

Næsta val sleppa hoyvíkingar á val í Hoyvík. Men hestfólk mugu av oynni at velja, ella velja við brævi.

Landsstýrismaðurin í lógarmálum hevur góðkent umbøn frá Tórshavnar kommunu, um at skipa Hoyvík sum egið valstað og at niðurleggja valstaðið í Hesti.

Tórshavnar kommuna hevur sent Løgmálaráðnum umbøn um loyvi at skipa Hoyvík sum egið valstað. Tórshavnar kommuna greiðir frá, at hetta fer at minka um veljarafjøldina til valstaðið á Hálsi í Havn umleið 25 prosent.

Hestur er í dag valstaður. Veljarar í Hesti og Koltri velja í Hesti.

Kunnu brævatkvøða

Tórshavnar kommuna hevur - á staðbundnum fundi við nevndina fyri Hest - avtalað at niðurleggja Hest sum valstað, soleiðis at fólkið í Hesti og Koltri frameftir velja í Havn.

Avtalað var eisini, at Tórshavnar kommuna í staðin bindur seg til at fara út í Hest tvær ferðir til brævatkvøðu. Fólk í Koltri søgdu seg heldur vilja atkvøða í Havn, tí tað er lættari enn at sigla út í Hest.

Fyrireikingararbeiðið er byrjað.

Indenrigs- og Sundhedsministeriet er kunnað um ætlaðu broytingina, og hevur svarað, at tey eisini fara at gera somu broyting, soleiðis at valstøðini í báðum lógumum - lóg um val til Løgtingið og lov om folketingsvalg på Færøerne - verða tey somu.