Dømdir fyri stuldur og vístir av landinum

Tveir menn vóru í Føroya Rætti í gjár dømdir fyri stuldur. Menninir, sum vóru útlendingar, vóru samstundis útvístir úr Føroyum.

Tað boðar løgreglan frá í dag. 

Føroya Rættur viðgjørdi í gjár eitt mál, har tveir menn úr Póllandi vóru ákærdir fyri stuldur.

Menninir vóru ákærdir fyri í felag at hava stolið amboð fyri uml. 50.000 kr.,  m.a. frá arbeiðsgevaranum. 

Annar maðurin játtaði seg sekan, meðan hin noktaði.

Báðir menninir vóru í einum dómsmansrætti í Føroya Rætti dømdir sekir, og fingu 60 daga lutvíst treytaða fongsulsrevsing hvør.

Aftrat fongsulsrevsingini vóru menninir útvístir úr Føroyum, og teir sleppa ikki aftur til Føroya fyrr enn í fyrsta lagi um trý ár.

Báðir menninir tóku við dóminum. Menninir sita nú í varðhaldi, til teir verða vístir av landinum.