Gjøld fyri eftirlit verða nú ásett í kunngerð

Neyðugt er í kunngerð at áseta gjøldini, sum Arbeiðs- og brunaeftirlitið tekur fyri eftirlit sambært lógini um mát og vekt, tað er eftirlit við vektum.

Bæði Landsgrannskoðanin og Løgmálaráðið hava víst á, at verandi loysn við príslista ikki er í lagi.

Í fjør vísti Landsgrannskoðanin á, at ásetingin av gjøldum var ivasom og ógreið.

Hon átti at verið gjørd við kunngerð. 

Umhvørvismálaráðið hevur tí gjørt uppskot um slíka kunngerð.

Prísirnir óbroyttir

Í fjør góvu eftirlitini Arbeiðs- og brunaeftirlitinum 720.000 krónur. Útreiðslurnar vóru 850.000 krónur.

Uppskotið um kunngerð broytir tó ikki verandi prísir. Men teir vera nú lógarfestir. 

Prísirnir í Føroyum eru 5 til 10 prosent hægri enn í Danmark.

Men tað hevði verið nógv dýrari, var vinnan noydd til at fáa útlendskar veitarar til Føroya, sigur Umhvørvismálaráðið.