Hassj fyri triðju ferð í trolara

Nú er aftur funnið hassj um borð á grønlendska trolaranum Polar Nataarnaq.

Tá manningin gjørdi reint í verksmiðjuni, vóru funnin 1,8 kilo av hassji, skrivar miðilin Sermitsisaq.AG.

Hann hevur fingið tíðindini váttað hjá politinum í Grønlandi, sum sigur seg hava sent politinum í Føroyum málið.

Tað er tí, at Polar Nataarnaq er á Skála til umvælingar. Hann hevur ikki verið í Grønlandi í hesum umfarinum.

Rendi á ísfjall

Tí leygardagin sigldi hann á eitt ísfjall sunnan fyri Grønland.

Eingin fólkaskaði var. 13 mans eru við trolaranum.

Polar Nataarnaq var á veg til Grønlands, eftir at hava verið á beding í Danmark.

Meðan hann var har, vóru funnin fýra kilo av hassji umborð.

Á veg heim til Grønlands var trolarin á Havnini. Tá vóru funnin fimm kilo aftrat av hassji umborð.

So tollarar hava funnið níggju kilo og manningin sjálv 1,8 kilo av hassji um borð á Polar Nataarnaq.