- Tíðindi, mentan og ítróttur
Fimm mánaðar fongsulsrevsing fyri at smugla hassj
![](https://kvf.fo/sites/default/files/styles/grein-ovasta-mynd/public/shutterstock_2134653223.jpg?itok=-cTyZy-O)
Tað var sunnukvøldið 2. juli, at hundarnir hjá tollvaldinum fingu illgruna til kvinnunan, tá ið hon kom við flogfari til Føroya.
Kvinnan sat í koyristóli.
Tá ið tollararnir kannaðu stólin nærri, funnu teir yvir tvey kilo av hassji í stólinum.
Seinni vísti tað seg, at kvinnan kundi ganga.
Kvinnan var í grundlógaravhoyring varðhaldsfonglað í fýra vikur. Hald var eisini lagt á koyristólin.
Italskt og dominikanst pass
Kvinnan hevði italskt og dominikanskt pass.
Ákærin heldur ikki, at kvinnan hevur verið í Føroyum áður.
Ákærin heldur, at hassji skuldi seljast í Føroyum, men ákæruvaldið veit tó ikki, um møguliga onnur fólk vóru við í ætlanini.
49 ára gamla kvinnan var í Føroya Rætti í dag dømd fimm mánaðar fongsulsreving fyri at hava smuglað 2 kilo og 74 gramm av hassji til Føroya.
Hon er eisini víst út úr landinum, og hevur fingið sýtt innferðarloyvi til Føroya í fimm ár.