Føroyingur settur í varðhald í psykiatriskum sjúkrahúsi

Rætturin í Hillerød hevur sett ein 32 ára gamlan føroying í varðhald í psykiatriskum sjúkrahúsi. 

Læknar og dómsvaldið skulu seinni meta, um treytirnar í dóminum skulu gerast linari ella strikast.

Maðurin tók við dóminum.

Maðurin var ákærdur fyri at dripið eina 60 ára gamla kvinnu í Fredrikssund 6.august í fjør, skrivar Ritzau.

Hann kendi ikki kvinnuna.

Sambært ákæruritinum setti hann eld á eini summarhús, gav einum løgreglumanni nevan og sló ein annan nógvar ferðir, tá hann skuldi takast.

Hassj uppi á sær

Tá hann var tikin á Amager, hevði hann sløk 300 gramm av hassji uppi á sær.

Maðurin játtaði seg sekan í drápinum, tá hann var tikin.

Hann skal hava sagt, at hann var errin av tí. Hetta var einasti útvegur, segði hann.

32 ára gamli maðurin var eisini ákærdur fyri at hótta eitt starvsfólk á Psykiatrisk Center Ballerup.

Hann hevur verið í varðhaldi síðani 7. august í fjør.