Eldurin á Stykkinum í rættinum í dag

Málið um eldin á Stykkinum í september í 2021 verður viðgjørt í Føroya rætti í dag.

Rætturin fekk ákæruritið á vári í fjør. 

Sambært ákæruritinum eru tveir menn, fyrst í tjúgunum, ákærdir fyri seint eitt septemberkvøld í 2021 at hava brotið inn í eini hús á Stykkinum og sett eld á húsini.

eldur í húsum á Stykkinum, eldur á Stykkinum, eldsbruni á Stykkinum

(Mynd: Bjarni Árting Rubeksen)

Festi eisini í grannahús

Annar maðurin skal hava stoytt spritt á eina song og tvær sofur, og skal síðani hava fest í. 

Sambært ákæruritinum bíðaði maðurin inni í húsinum, til eldurin logaði. 

Eldurin gjørdist so mikið stórur, at hann festi í eini grannahús.  Bæði húsini fingu stóran skaða.

eldur í húsum á Stykkinum

(Mynd: Bjarni Árting Rubeksen)

3,7 mió. kr.

Skaðin er fyribils mettur til góðar 3,7 milliónir krónur, stendur í ákæruritinum.

Sami maður er eisini ákærdur fyri at hava sett eld á ein bil. Hetta var sama kvøldið, sum eldurin var á Stykkinum.

Maðurin er eisini ákærdur fyri í fleiri førum at hava rúsevni uppi á sær, at koyra bil ávirkaður av rúsevnum, og fyri innbrot og stuldur.