Kanning: Lærugreinar eru keðiligari og hava minni týdning nú

Næmingar í fólkaskúlanum halda lærugreinarnar hava munandi minni týdning nú, enn fyri 10 árum síðani, eins og tær eisini verða fataðar keðiligari nú. 

Tað vísir nýggj trivnaðarkanning, sum Námsvísindadeildin á Setrinum hevur gjørt fyri Barna- og útbúgvingarmálaráðið.

Næmingar í 5. 7. og 9. flokki vóru við í kanningini. 

Kanningin er gjørd tvær ferðir áður,  í 2015 og 2019, og nú í 2023. 

Ávirkar arbeiðsfriðin

Trivnaðarkanningin staðfestir harumframt, at næmingatalið hevur ávirkan á arbeiðsfriðin í flokkinum. Næmingar í stórum flokkum siga seg m.a. hava ilt við at hoyra, hvat lærarin og hinir næmingarnir siga.

Kanningin vísir, at betri arbeiðsfriður er, tá ið floksstøddin er niðan fyri 18-20 næmingar.

Hetta vísir seg eisini, tá ið ræður um at hoyra, hvat lærarin sigur, og hvat hinir næmingarnir siga. Tí verður mælt til, at í mesta lagi 20 næmingar vera í flokkinum.

1696 næmingar í 38 skúlum hava svarað spurnakanningini.