Danskir pengar til føroyskar verkætlanir

GEV GÆTUR: Í innslagnum verður sagt, at peningurin til havgransking fer til Havstovuna. Hann fer til Granskingarráðið at umsita.

Tey eru komin til sættis um donsku fíggjarlógina á Christiansborg fyri næsta ár. Aftur hesaferð eru føroyingar við. Stóra upphæddin hesaferð er til nýtt sjósavn í Havn. Danski skattgjaldarin skal rinda 20 milliónir krónur í løgujáttan til nýggja sjósavnið. Hetta er ein avtala, sum Sjúrður Skaale, fólkatingslimur hevur fingið í lag.

Anna Falkenberg hevur eisini skaffað pengar. Tað er tó ikki til løgujáttan, men størsta upphæddin, sum hon hevur gjørt avtalu um, fer til Granskingarráðið. Danski skattgjaldarin skal rinda 15,8 milliónir krónur til gransking í havstreymunum kring Føroyar og í Norðuratlantshavi.

Føroysku fólkatingsumboðini hava gjørt avtalur um góðar 40 milliónir krónur á donsku fíggjarlógini í hesum umfari.

Men tað er ikki fyrstu ferð. Blokkurin er lækkaður, men nógvar føroyskar verkætlanir hava seinastu árini fingið stóran part av fíggingini úr danska statskassanum.