Fýra vikur aftrat í varðhaldi

Ein maður og ein kvinna, sum eru skuldsett fyri harðskap móti einum barni, fingu í Føroya rætti í dag at vita, at tey skulu vera fýra vikur aftrat í varðhaldinum í Mjørkadali.

Føroya rættur gav ákæruvaldinum viðhald.

Men báðir verjarnir kærdu úrskurðin hjá Føroya rætti til Landsrættin.

Fólkini eru skuldsett fyri harðskap móti einum tríggjar mánaða gomlum barni.

Tey eru skuldsett eftir grein 246 í revsilógini, sum er um grovasta harðskapin.

Tann greinin sigur, at hevur harðskapurin við sær annans deyð, ella er hann aðramáta so grovur, ella hevur so álvarsaman skaða við sær, at talan er um serliga skerpandi umstøður, kann revsingin vera fongsul upp í 10 ár.

Málið er higartil viðgjørt fyri afturlatnum durum, so lítið fæst at vita um tað.