Tapa ov nógvar tvísdystir í verjuspælinum

 - Niðurstøðan er, at vit mugu hava rættan rygg, og so hava vit ein dyst ímóti Norra í ovurmorgin.

Tróndur Mikkelsen hugdi frameftir, eftir trímálstapið fyri Slovenia í fyrsta EM-dystinum í Berlin hósdagin. Føroyingarnir høvdu alla orsøk at vera ernir av avrikinum, menmáttu samstundis ásanna, at nógv krevst á hægsta stigi.

 - Vit spæla ein fínan dyst, men vit tapa alt ov nógvar tvídystir mann ímóti manni í verjuni, segði bakkurin, sum skeyt tvey mál.
 
Eins og fleiri av hinum spælarunum, rósti Tróndur Mikkelsen føroyska avrikinum á áskoðaraplássunum, har fleiri 1000 føroyingar gjørdu sítt til fyri at bera føroysku spælararnar fram.

 - Tey hjálpa okkum øgiliga nógv í dag. Høvdu vit verið eitt sindur skarpari, høvdu vit kanska staðið eftir við einum sigri, segði Tróndur Mikkelsen.