Gunnar: Leggi ikki í hvar teir spæla

Madrid, London og Napoli.

Fleiri av slovakisku spælarunum, sum vitja Tórsvøll til dyst ímóti Føroyum í Nations League, spæla á fínum evropeiskum adressum, men tað leggur Gunnar Vatnhamar ikki stórvegis í. 

 - Um eg skal vera heilt erligur, so leggi eg ikki í, hvar teir spæla. Eg brenni fyri at spæla fyri føroya fólki og Merkinum, og fari inn í hvønn dyst upp á sama máta. Tað er líka mikið, um vit spæla ímóti San Marino, Slovakia ella Danmark, so geri eg akkurát tað sama, segði Gunnar Vatnhamar undan triðja Nations League-dystinum í hesum umganginum.

Verjuskansin, sum fyri kortum skifti úr Víkingi í Reykjavík til Vejle BK í næstbestu donsku deildini, telist millum royndu spælararnar í landsliðnum, og trívist væl í trímansverjuni ímillum Andrias Edmundsson, Odmar Færø ella aðrar, sum manna plássini. Eisini bar hann liðskiparabandi eina løtu í Moldova, tá Viljormur Davidsen varð útskiftur.

 - Tað kennist væl. Tað er bara deiligt at hava fingið tað álitið frá venjarunum, segði Gunnar Vatnhamar og rósar annars hinum í verjuni.

 - Eg skal bara práta nokk, so klára hinir tað so ólukksáliga væl. Men eg geri í øllum førum mítt besta fyri at verja málið.

Júst tað verður lykilin fríggjakvøldið, tá bóltkringu slovakarnir fara at søkja at. Gunnar Vatnhamar trýr kortini upp á, at teir megna at halda málið reint.

 - Eitt "clean sheet" og mál. So er sigurin har, segði verjuspælarin.