Sjóforhoyr um Kamb verður í næstu viku

Sjóforhoyrið eftir vanlukkuna við Kambi verður væntandi týsdagin ella mikudagin í næstu viku.

Tað sigur Henrik Møller, sorinskrivari.

Føroya Rættur er nú farin undir at kanna, hvør og hvussu nógv vitni verða innkallað, sigur hann.

Talan verður helst um í øllum førum ein part av manningini á Kambi.

Eisini serkønir dómarar

Til slíkt sjóforhoyr er ein løgfrøðiligur dómari umframt tveir serkønir dómarar. Teir serkønu vera helst ein skipsførari og ein maskinmeistari, sigur Henrik Møller.

Enn er ikki vist, hvussu drúgv tíð verður sett av til sjóforhoyrið, tí tað veldst millum annað um, hvussu nógv vitni verða innkallað at greiða frá.

Sjóforhoyrið er alment.

Sjóvinnustýrið bað um forhoyr

Tað var Sjóvinnustýrið, sum bað Føroya Rætt um at skipa fyri sjóforhoyri, og hevur eisini heitt á donsku Skaðanevndina um at koma til Føroya í sambandi við kanningararbeiðið.

Skaðanevndin kemur til Føroya í dag, sigur Hans Johannes á Brúgv, stjóri í Sjóvinnustýrinum.