Nógv er ofta átalað og okkurt er komið aftrat

Batar eru í landsroknskapinum fyri 2022 sammett við 2021.

Men framvegis eru nógv viðurskifti, sum ofta eru átalað, og nýggj eru komin aftrat.

Tað sigur fíggjarnevndin í álitinum um uppskotið hjá løgtingsgrannskoðarunum um landsroknskapin fyri 2022. 

Nevndin tekur undir við viðmerkingunum, sum løgtingsgrannskoðararnir leggja dent á í sínum uppskoti.

Fíggjarnevndin sigur, at hon hevur fingið at vita frá Fíggjarmálaráðnum, at miðað verður eftir at hava fullfíggjaðan landsroknskap í ár.

Asfaltverkið

Fíggjarnevndin heldur ikki, at arbeiðið við asfalt-og skervverkinum er nóg væl loyst.

Verkið var liðugt í fjør. Tað skuldi upprunaliga kosta 50,5 mió.kr., men kostaði 61,1 mió.kr. 

Roynt verður at koma á mál við einari semju í vár um almennar byggiverkætlanir.

Samskifti er við allar flokkar og limirnar í fíggjarnevndini, sigur Fíggjarnevndin.

Løgmaður hevur sagt við nevndina, at eingin orsøk er at steðga arbeiðinum við vanligum byggiverkætlanum til semjan er gjørd.