Gongur vinnuni ov nær

Kappingareftirlitið eigur ikki at sleppa at geva lógarbindandi boð um leiðreglu um vinning. 

Her verður gingið fríum vinnulívi rættiliga nær. 

Tað heldur minnilutin í vinnunevndini hjá løgtinginum, Fólkaflokkurin, í álitinum um uppskotið hjá landsstýrinum um broytingar í kappingarlógini.

Almenni mynduleikin fær heimild at áseta fyri vinnur, hvønn vinning tær kunnu hava, sigur Fólkaflokkurin, sum hevur broytingaruppskot. 

Tað er, at heimildin hjá Kappingareftirlitinum skal bara vera galdandi í teimum førum, tá vøran ella tænastan hevur fingið stuðul, sum er ætlaður brúkaranum.

Í øðrum førum má rættarskipanin taka støðu um boð um vinning.

Endamálið við broytingaruppskotinum er at avmarka møguleikan hjá Kappingareftirlitinum at geva boð, tá talan er um marknaðargreining. 

Annars tekur Fólkaflokkurin undir við uppskoti landsstýrisins.

Meirilutin í vinnunevndini, samgomguflokkarnir og Sambandsflokkurin, tekur undir við uppskoti landsstýrisins.