Spilt frukt og grønt verður til grøna orku hjá Førka

Nøkur hotel, heilsølur og stórkøkar í Tórshavnar kommunu eru við í verkætlanini, at lata tað, sum verður flust av fruktini, spilta frukt og annað grønt, ið ikki kann nýtast til mannaføði, til Førka, sum nýtir tað at framleiða elorku, fjarhita og tøð. 

Í eitt ár hevur Betri Banki verið partur av verkætlanini, og tey eru væl nøgd við skipanina.

Í innslagnum omanfyri síggja vit Brynhild Høgnadóttir Granhøj, burðardygdsábyrgdari í Betri Banka, og Fróða Mortensen, leiðara í Førka.

Framleitt 1,8 prosent av orkuni

Altjóða krøv forða fyri, at húsarhald kunnu lata vanligar matleivdir inn til Førka at framleiða til orku, sigur Fróði Mortensen, leiðari á Førka.

Umframt úr frukt og grønum, framleiðir Førka eisini orku úr mykju og súrløgi av laksi.

Seinastu vikuna hevur Førka framleitt 1,8% av elorkuni í Føroyum.