Fríkendur fyri neyðtøku í Føroya rætti - dømdur í landsrættinum

Eystari landsrættur hevur dømt ein mann fyri neyðtøku, sum í juni í fjør í Føroya Rætti var fríkendur fyri somu neyðtøku, upplýsir Føroya Politi. 

Maðurin, sum er 28 ára gamal, er í landsrættinum dømdur fyri at hava neyðtikið eina 23 ára gamla kvinnu í desember 2022.

Av tí at maðurin var fríkendur í Føroya rætti, skeyt ákæruvaldið dómin inn fyri landsrættin við kravi um, at maðurin skuldi dømast. Neyðtøkan var framd, eftir at grein 216 í revsilógini um neyðtøku var broytt til eina samtykkigrundaða neyðtøkuáseting.

Landsrætturin tók undir við ákæruvaldinum og dømdi mannin eitt ár og tveir mánaðar treytaleysa fongsulsrevsing fyri neyðtøku.

Maðurin er sostatt dømdur eftir nýggju neyðtøkuásetingini, sigur Føroya Politi í tíðindaskrivi.