Landsrætturin viðger mál um kokainsmugling

Landsrætturin fer í dag viðgera ein dóm um at smugla rúsevni til Føroya.

Ein kvinna í 30'unum var í Føroya Rætti dømd seks ára fongsul fyri at smugla kokain til Føroya. Hetta var í juni í fjør.

Kvinnan er úr Dominikanska lýðveldinum. Hon hevði m.a. krógvað tað í 63 posum við 10 gr. av kokaini í hvørjum í móðurskeiðini. 

Kvinnan hevði ferðaseðil til Íslands dagin eftir.

Eisini smuglað til Íslands

Í sambandi við kanningar í málinumm, vóru, sambært løgregluni, funnin prógv fyri, at kvinnan eisini hevði smuglað 900 gr. av kokaini um Føroya til Íslands.

Ábendingar eru um, at hesi 1,5 kilo'ini av kokaini helst vóru ætlað íslendska marknaðinum, og tey 900 grammini, sum ongantíð eru funnin, eru helst eru latin víðari til onkran. 

Tollvaldið var við til at avdúka smuglingina.

Kært til landsrættin

Kvinnan hevur kært dómin til Landsrættin við kravi um frídøming fyri tey 900 grammini av kokaini, sum løgreglan ikki hevur funnið, men sum skulu vera smuglað til Íslands. 

Hon noktar seg seka í í ákæruni um hetta.