30 nýggj grundstykki á Sandi

Arbeiðið at gera 30 grundstykki byggibúgvin í Skarðsbøi á Sandi er nú liðugt, og somuleiðis grundstykki til nýggja barnagarðin við tilhoyrandi parkeringsplássi.

Tað veit heimasíðan hjá Sands kommunu at siga frá J&K Petersen, sum hevur gjørt arbeiðið.

Stórur áhugi er fyri at fáa grundstykki á Sandi, og fyri nøkrum mánaðum síðani stóðu 67 fólk á bíðilista at fáa stykki.

Umframt tey 30 grundstykkini, ið nú eru gjørd byggibúgvin, hevur Sands kommuna ognað sær eitt stykki í Sandabrekkuni, ið somuleiðis skal brúkast til bústaðir.

Nú kann so eisini farast undir at byggja nýggja barnagarðin, sum verður tvær ferðir so stórur sum verandi barnagarður á Sandi.

Nýggi barnagarðurin skal liggja upp at nýggju útstykkingini í Skarðsbøi.