- Tíðindi, mentan og ítróttur
Seinkað boriarbeiði verður dýrari
<div>Arbeiðið at bora tunlarnar í stóru Eiði 2-verkætlanini hjá SEV verður nógv seinkað, og tað fer eisini at dýrka verkætlanina munandi. Tí hava MT Højgaard og J&K Petersen, sum gera arbeiðið, sett SEV nýggj krøv. </div><div><br></div><div>Verkætlanarleiðarin fýlist á, at røttu upplýsingarnar ikki komu fram, áðrenn arbeiðið byrjaði, men hesum vísir stjórin í SEV aftur. </div><div><br></div><div><b>Harðari grót</b></div><div><br></div><div>Sambært Torben Johansen, verkætlanarleiðara, sum umboðar MT Højgaard og J&K Petersen, er grótið, har borað verður, harðari, enn roknað varð við. Tað merkir, at tað tekur longri tíð at bora enn væntað.</div><div><br></div><div>Eftir ætlan skuldi arbeiðið at bora verða liðugt í mars mánaði næsta ár. Men tíðarætlanin fer ikki at halda. Torben Johansen metir, at arbeiðið í minsta lagi verður eitt hálvt ár seinkað - tað merkir, at tað í fyrsta lagi verður liðugt í september næsta ár. </div><div><br></div><div><b>Einki kannað frammanundan</b></div><div><b><br></b></div><div>Torben Johansen vísir á, at ongar kanningar vórðu gjørdar av grótinum, áðrenn arbeiðið byrjaði, og tí er tað komið óvart á, at grótið er harðari, enn roknað varð við. </div><div><br></div><div>- Tað skuldi verið gjørt, tí hevði samtakið havt kunnleika til ta vitan, sum nú er komin fram, høvdu fyrireytirnar fyri arbeiðinum verið heilt øðrvísi, sigur hann.</div><div><br></div><div>Nýggjar mátingar hava eisini staðfest, at innihaldið av vandamikla evninum kvarts, sum kann vera heilsuskaðiligt, er nógv størri, enn roknað var við frammanundan.</div><div><br></div><div><b>Arbeiða færri tímar á vaktini</b></div><div><br></div><div>Higartil hava arbeiðsfólkini hjá MT Højgaard og J&K Petersen, sum gera arbeiðið, arbeitt í vaktum, sum hava verið 12 tímar. Men tað er ikki ráðiligt at arbeiða í 12 tímar, sum støðan er, sigur Torben Johansen, verkætlanarleiðari. </div><div><br></div><div>Tað merkir, at arbeiðsfólkini nú bert kunnu arbeiða í 6-8 tímar hvørja ferð. Og tað seinkar arbeiðinum. Torben Johansen vil ikki siga, hvørji krøv samtakið fer at seta fram ímóti SEV, nú arbeiðið er seinkað, og tí fer at kosta samtakinum nógv meira enn væntað. </div><div><br></div><div><b>Partarnir ósamdir</b></div><div><br></div><div>Hákun Djurhuus, stjóri í SEV, váttar, at SEV hevur fingið at vita, at arbeiðið verður seinkað eitt hálvt ár. Tí eru samráðingar í løtuni millum SEV og arbeiðstakaran, hvussu víðari skal farast fram.</div><div><br></div><div>Hákun Djurhus vil ikki gera viðmerkingar til sjálvar samráðingarnar, men ásannar, at tað fær fíggjarligar avleiðingar, nú verkætlanin er seinkað. </div><div>Hann sigur, at partarnir eru ósamdir um grundarlagið undir ósemjuni. </div><div><br></div><div>SEV metir, at nóg væl varð kunnað um tilfarið í grótinum, og tí er einki at finnast at, sigur Hákun Djurhuus. Semjast partarnir ikki, kann málið enda í gerðarrættinum.</div><div><br></div>
