Breiða semjan ikki uttan lýti

Javnaðarflokkurin, Tjóðveldi, Framsókn og Sambandsflokkurin hava seinnapartin skriva undir eina semju um tøkugjald og serskatt til alivinnuna, og røkkur semjan tvørtur um valskeið, fram til 2032.

Teir fýra flokkarnir siga, at skipanin skal tryggja landinum eitt rímiligt og rættvíst gjald fyri rættin at ala í Føroyum.

Tøkugjaldið byrjar á 0,5 prosentum og endar á 7,5 prosentum, alt eftir altjóða laksaprísinum, og serskatturin verður átta prosent av yvirskotinum hjá alifeløgunum.

Vón um broyting
- Tað, at tú rindar lutfalsliga mest, tá ið tú tjenar minst, er eitt lýti við semjuni, ið vónandi verður broytt, tá ið løgtingið fer undir at viðgera uppskotini, sigur Atli Gregersen, stjóri í Hiddenfjord.

- Tá ið tú tjenar nógv, rindar tú eitt ella annað lutfall av tíni inntøku, men tá ið tú tjenar stak lítið, fer at kalla alt í skatti. Í veruleikanum er tað so, at við fyrstu tjentu krónuna rindar tú meira enn alt í skatti.

Uppskotið um tøkugjaldið verður lagt fram í vár, og uppskotið um serskatt av yvirskoti í alivinnuni í heyst, og lógarbroytingarnar koma í gildi 1. januar.

Hoyr útvarpssamrøðu við Atla Gregersen her: