Landsliðsvenjarin: Álopsspælið riggaði, sum tað skuldi

Sterka føroyska verjan fór avstað við yvirskriftunum eftir tepra tapið fyri Svøríki í gjár, men landsliðsvenjarin, Claus Mogensen var serliga væl nøgdur við føroyska álopið.

 - Vit eru rólig og gera okkum ómak við uppbyggjandi álopsspælinum, og tað ger, at vit fáa nógvar góðar málkjansir, segði Claus Mogensen.

 - Vit misnýta í roynd og veru eisini stórar møguleikar, men tá álopini eru somikið væl løgd til rættis, fáa vit eisini runnið upp á pláss aftur.

Landsliðsvenjarin rósti Janu Mittún og Súnu Krossteig Hansen, sum høvdu høvuðsábyrgdina fyri føroyska álopsspælinum. Tær báðar skiftust um at bjóða av og skjóta mál ella skapa pláss, sum Elsa Egholm og Lív Sveinbjørnsdóttir Poulsen gjørdu sær dælt av.

 - Tað er nakað serligt fyri Føroyar, at vit hava so nógvar spælarar, sum eru so sterkir í tvídystunum, og so ræður um hjá okkum at gagnnýta tað.

Føroysku kvinnurnar fylgdu við sterka svenska liðnum ígjøgnum meginpartin av dystinum og munurin var ongantíð størri enn fimm.