Ferðsluóhapp í Eysturoyartunlinum

Stutt fyri døgurða hendi eitt ferðsluóhapp niðri í Eysturoyartunlinum. Ein bilur rendi á listarverkið, í sjálvari rundkoyringini niðri í tunlinum.

Løgreglan fekk fráboðan um óhappið klokkan 11:35. 

Eysturoyartunnilin varð stongdur eina lítla løtu, so neyðsynjarakfør kundu sleppa ótarnað framat. Men tunnilin var latin upp aftur fyri ferðslu lítla løtu seinni.

Ein einsamallur, eldri maður var í bilinum. Hann var við vit, men var fluttur á Landssjúkrahúsið til kanningar. 

Enn veit løgreglan ikki, hví bilurin rendi á rundkoyringina niðri í Eysturoyartunlinum.

Greitt er, at listarverkið hjá Tróndi Patursson hevur fingið skaða, men er óvist, hvussu nógvan skaða tað hevur fingið. Eisini fekk bilurin nakað av skaða.