4 mió. til graslíkið við Djúpumýru

Sambært gerðabókini er fótbóltsvøllurin sera slitin, og KÍ hevur biðið kommununa um at skifta vøllin. 

Arbeiðið er mett at kosta 4,6 milliónir krónur, tað er íroknað nýtt graslíki og burturbeining av tí gamla. Fótbóltssambandið stuðlar arbeiðinum við 600.000 krónum.

Tveir býráðslimir í Klaksvík - Tummas Lervig og Eyðstein Poulsen - eru ógegnigir at viðgera málið, tí teir eru ávíkavist formaður í KÍ og starvsnevndarlimur við ábyrgd av ungdómsdeildini hjá felagnum.

Fyrrakvøldið samtykti ein breiður meiriluti av býráðnum at játta tær fýra milliónir krónurnar, so graslíkið kann skiftast longu í juni mánað. Bara ein atkvøða var ímóti. 

Málið skal hava eina viðgerð afturat í býráðnum.