Savna undirskriftir at seta kanningarstjóra

Andstøðan vil hava ein kanningarstjóra at kanna tunnilsmálið, og í løtuni royna andstøðuflokkarnir at savna neyðugu 14 undirskiftirnar, sum skulu til, fyri at málið kann verða lagt fram.

Tunnilsmálið setur dám á orðaskiftið í tinginum í dag, tí fleiri munnligir fyrispurningar eru um tunnilsmálið.

Løgmaður hevur júst svarað einum fyrispurningi frá Høgna Hoydal úr Tjóðveldi um fundin við CIP um millióna-endurgjaldið. Kaj Leo Holm Johannesen svaraði, at hann hevði kallað inn til fundin, og at CIP royndi eisini at fáa seg at skriva undir avtaluna, men tað vildi løgmaður ikki, tí hann skal hava eftirlit við landsstýrisfólkunum.

Løgmaður segði, at hann hevur einki ímóti, at ein kanningarstjóri verður settur.

Jenis av Rana, samgongutingmaður, segði, at hann skilti ikki, hví CIP ikki varð biðið um "at skrubba av," sum hann tók til. Jenis av Rana helt, at milliónin eigur heldur at verða nýtt at seta ein kanningarstjóra.