Sverri í fjórðingsfinalurnar uttan trupulleikar

Sverri Sandberg Nielsen fekk góða byrjan upp á Olympisku leikirnar, tá hann vann sín bólk í innleiðandi einskullararógvingini í morgun.

Miðvingurin hevur verið darvaður av ryggskaða síðstu vikuna, men í fyrsta OL-róðrinum hevði hann væl og virðiliga nóg mikið til at rógva seg í fjórðingsfinalurnar, sum vera týsdagin.

Sverri Sandberg Nielsen hevði tamarhald á róðrinum allar 2000 metrarnar, og kom um mállinjuna við tíðini 06:53.50. Bulgarin Kristian Vasilev (06:56.63) og Bendeguz Pal Petervari Molnar úr Ungarn (06:58.76) komu á mál ávíkavist nummar tvey og trý og skulu saman við føroyinginum í fjórðingsfinaluna.

Hollendarin, Simon Von Dorp, sum róði í bólki 3, hevði bestu tíðina fyrrapartin. Hann róði teinin upp á 06:49.93. Annars vóru vinnaratíðirnar úr hinum fimm bólkunum lutfalsliga javnar og skulu altíð takast við fyrsivarni.

Næsti róðurin við føroyskari luttøku verður ólavsøkudag. Tá skal Sára Maria Johansen og danski áttarin rógva innleiðandi umfarið.