Biða fólk fara úr Libanon

Sambært norska kringvarpinum hava bæði USA og Stórabretland biðið sínar ríkisborgarar fara úr Libanon sum skjótast.

Londini óttast, at stríðið millum Ísrael og Hizbollah fer at enda í kríggi.

Amerikanskir ríkisborgarar eru bidnir um at fara við fyrsta flogfarinum úr Libanon. 

Bretski uttanríkisráðharrin, David Lammy, metir, at støðan kann broytast heilt skjótt, og biður tí allar bretar um at fara burtur hagani beinavegin.

Sviar hava gjørt av at steingja svensku sendistovuna í Libanon av ótryggu støðuni.

- Starvsfólk á sendistovuni eru biðinum at fara úr Beirut til Kypros. Uttanríkiráðið hevur ætlanir um at flyta sendistovuna fyribils, sigur Tobias Billström, svenskur uttanríkisráðharri, við svenska TV4.
Norska uttanríkisráðið sigur, at ætlanir eru um tryggja sendistovuna, um trygdarstøðan møguliga versnar, sigur Mathias Rongved, pressuvakt fyri uttanríkisráðið.

- Vit hava í longri tíð rátt norskum ríkisborgarum til at fara úr Libanon. Um flogvøllurin í Beirut steingir verður tað sera krevjandi at sleppa úr landinum. Um tað gerst støðan verður tað sera torført hjá norska uttanríkisráðnum at veita norskum ríkisborgarum hjálp, sigur hann.