Samgongulimur: Antitrustreglurnar í fiskivinnuni skulu herðast fyrst

Uni Holm Johannesen, samgongutinglimur fyri Javnaðarflokkin, heldur, at tað er umráðandi, at antitrustreglurnar verða herdar, áðrenn brúksskylda verður løgd á uppsjóvarfisk. 

Antitrustreglurnar eru reglurnar um, at ongar fyritøkur mugu hava monopol upp á eina ávísa vinnu. 

"Í løtuni eru vit við til at avhenda alla fiskivinnuna til fýra stór reiðarí," staðfestir Uni Holm Johannesen. 

Landsstýrismaðurin í fiskivinnumálum hevur enn einaferð lýst eina kunngerð, ið býtir yvir 17.000 tons av makreli til heimaflotan og rækjuskip - tær sokallaðu stuðulskvoturnar - ið eru til at selja. 

Dennis Holm hevur, síðani hann bleiv landsstýrismaður í fiskivinnumálum, sagt, at makrelkvotur ikki skulu latast sum stuðul til skip, og tað er semja um hetta í samgonguni.

Men enn er ikki semja um, hvussu stuðulskvotur skulu avtakast. 

"Tað er ikki undirtøka fyri at avtaka undantakið fyri brúksskyldu uttan broytingar til dømis í skattalógini," sigur Dennis Holm, landsstýrismaður í fiskivinnumálum.