- Tíðindi, mentan og ítróttur
Væntar svar um miðfyrisitingina hósdagin
![](https://kvf.fo/sites/default/files/styles/grein-ovasta-mynd/public/aksel_bardur_hogni_og_beinir-5-sharpenai-motion.jpg?itok=bmK2paVF)
Tað tekur longri tíð enn teir tíggju dagarnir, sum freistin er, hjá løgmanni at svara Bárði á Steig Nielsen, tingmanni, hvussu nógv miðfyrisitingin kostar.
Hetta var fyrsti grein 52a spurningurin í hesari tingsetuni. Freistin at svara grein 52a spurningum er tíggju dagar.
Teir tíggju dagarnir vóru farnir 13. august.
Men Løgmansskrivstovan bað um longda freist.
Svarið kemur væntandi hósdagin, sigur Bárður á Steig Nielsen.
Spyr um kostnaðin
Hann vil hava at vita, hvussu nógv aðalráðini í landsstýrinum kostaðu árini 2019 til 2023.
Bárður á Steig Nielsen sigur, at hann spurdi um tað sama í undanfarnu tingsetu, men fekk ikki rættiliga nakað svar, sigur hann.
- Tá henda samgongan kom, segði løgmaður, at miðfyrisitingin skuldi ikki kosta meira, sigur tingmaðurin.
Nú hálvtannað ár er liðið, er lýst eftir fólki til fleiri nýggj størv í miðfyrisitingini.
Og tríggir nýggir aðalstjórar eru settir.