Hassjmálið: Tveir menn fingu harðari revsing í Landsrættinum

Ákæruvaldið fekk Landsrættin at døma tveir ungar menn, sum vóru ákærdir í sonevnda stóra hassjmálinum, harðari revsing enn teir fingu í Føroya rætti.

Teir fingu tvey ár og sjey mánaðir og tvey ár og tríggjar mánaðir í Føroya rætti.

Í Eystari landsrætti fingu teir ávikavist tveir og tríggjar mánaðir aftrat.

Hetta er tó minni, enn ákæruvaldið kravdi. Tað kravdi ikki minni enn trý ár.

Menninir hava verið í varðhaldi í meira enn eitt ár. Og har eru teir enn, men nú sita teir dómin.

50,5 kilo av hassji

Málið er stórt, tí talan er um 50,5 kilo av hassji.  

Ein triði maður, hann er úr Litava, var fríkendur fyri at hava smuglað og selt rúsevni, men hann er dømdur fyri harðskap, hóttanir eftir lívinum og frælsistøku av tí eina føroyinginum. 

Hann fekk fýra mánaðir og var vístur av landinum. 

Hann hevur ikki søkt um endurgjald fyri tíðina, hann var í varðhaldi longur enn hann var dømdur at sita.

Ákæruvaldið appelleraði ikki fyri frídømingina fyri hassjið.