Noreg: Fiskimálaráðið verður niðurlagt

Norska fiskimálaráðið verður niðurlagt, og nýggi fiskimálaráðharrin skal sita í einum nýggjum ráði, ið fær heiti Vinnulívs- og fiskimálaráðið. Tað veit norska kringvarpið, NRK, at siga. Í dag verður nýggja borgarliga stjórnin í Noregi almannakunngjørd.

NRK hevur fyrr sagt frá álítandi keldum, at Elisabeth Aspaker úr Høyre verður nýggjur fiskimálaráðharri, men nú ljóðar eisini, at sjálvt ráðið, sum eitur Fiskeri- og kystdepartementet, verður niðurlagt og lagt undir vinnumálaráðið.

Fleiri ráðharrar í sama ráði

Tað er einki óvanligt í, at fleiri ráðharrar sita á sama ráði. Í Noregi er long siðvenja fyri til dømis, at uttanríkisráðharrin og menningamálaráðharrin sita í sama ráði. Eisini í kunnleikamálaráðnum hava sitið tveir ráðharrar, ein fyri kunnleika og ein fyri gransking og hægri útbúgvingar.

Dúgliga hevur verið gitt í norskum fjølmiðlum,  hvørji verða ráðharrar í nýggju stjórnini. Einasta, sum er vist ,er, at Erna Solberg, forkvinna í Høyre, verður forsætisráðharri. Hinir ráðharrarnir verða kunngjørdir seinni í dag.