ABBA talar at Trumpfyrisitingini

Starvsfólkahópurin, sum fyriskipar valfundir hjá Trump, sigur, at tey hava við avtalum við BMI, sum er felagsskapur fyri upphavsrætt, rætt til at brúka tónleikin hjá ABBA. Tað sigur eitt talsfólk við AP-tíðindastovuna.

Universal Music sigur við Svenska Dagbladet, at Trump hvørki hevur søkt ella fingið loyvi til hetta, men BMI gevur hinvegin forsetavalevninum hjá republikanarunum lutvíst rætt. Sambært BMI, hevur fyrireikingarbólkurin hjá Trump fingið sonevnt politiskt loyvi, sum gevur teimum atgongd til meira enn 22 milliónir sangir, - m.a. hjá ABBA.

Tónleikarar og lagsmiðir hava tó heimild at mótmæla og at sýta fyri, at politikarar brúka sangir hjá teimum. Trump hevur á valfundunum eisini víst sjónbandaløg hjá ABBA, og tað er ógreitt, um tað krevur eyka loyvi.

Fleiri tónleikarar hava áður noktað Trump at brúka teirra tónleik í sambandi við valstríðið, - m.a. The Rolling Stones, Foo Fighters, Céline Dion, Bruce Springsteen, Rhianna og Neil Young.