B68 fingið nýggjan formann

Fyrrverandi borgarstjórin í Nes Kommunu, Jóhannus Danielsen, er nýggjur formaður í B68.

Tað er greitt eftir eykaaðalfundin, sum var á Svangaskarði í gjár.

Jóhannus Danielsen loysir av fyri Høgna Petersen, sum fór frá sum formaður fyri kortum. 

Hetta hendi, eftir at Frihedsbrevet skrivaði um stóra íbúðarætlan á Toftum, sum eftir øllum at døma var steðgað upp. Høgni Petersen er stjóri í Skákinum, eitt felag, sum í samstarvi við litaviska felagið, MB Ibeta, stóð fyri íbúðarætlanini. 

MB Ibeta var samstundis høvuðsstuðul hjá B68, men sambært frihedsbrevet vóru tær 400.000 krónurnar, sum B68 skuldi fáa frá litavska felagnum, ongantíð komnar. 

Nýggja nevndin er skipað soleiðis:

Formaður: Jóhannus Danielsen
Varaformaður: Jann Ingi Petersen
Peningarøkil: Trúgvi Reinert Kjeld
Skrivari: Niclas Allan Danielsen
Ungdómsábyrgdari: Johnleif Gerðisá
Nevndarlimur: Rasmus Reinert Zachhau

Tiltakslimir:

Meinhard Fróði Højgaard
Niclas F. Davidsen