Sóllampur: Kunning er betri enn forboð

Kunning er nógv betri enn forboð. Tað heldur Føroya Arbeiðsgevarafelag, sum hevur sagt landsstýrinum sína hugsan um ætlanina hjá Heilsumálaráðnum at forbjóða fólki yngri enn 18 ár at brúka solarium. Arbeiðsgevarafelagið ivast í, um endamálið við lógini, sum er at minka um tilburðirnar av krabbameini, verður rokkið við forboði.

Ein miðvís kunning til tey ungu og foreldur teirra hevði givið nógv betri úrslit, heldur Arbeiðsgevarafelagið. Tað kann eisini hugsast, at einki eftirlit fer at geva lógini øvuta ávirkan. Tað verður spennandi at bróta reglurnar, ella fara fólk at fáa sær solarium heima við hús, sigur Føroya Arbeiðsgevarafelag.

Solariumlóg á veg í tingið

Á nýggjárinum verður forboðið at selja fólki, sum eru yngri enn 18 ár, solariumsól til kosmetiskt endamál, sum tað stendur í lógaruppskotinum. Men loyvt verður framvegis at selja tíð undir sóllampum at viðgera sjúkur við. Ein solariumlóg er á veg í løgtingið. Uppskotið hevur verið til hoyringar.

Í føroysku krabbameinsætlanini, sum kom í 2009, verður mælt til forboð fyri at lata ung, yngri enn 18 ár, sleppa at brúka solarium.