Gullpunktum: Heidi Sevdal spælir neyvan aftur

Heidi Sevdal setir helst gaggurnar á hillina.

 - Eg havi avgjørt, at eg fari at gevast, og at hetta var tað síðsta, og sum støðan er í løtuni, standi eg fast við tað, segði Heidi Sevdal, tá hon hevði vunnið føroyameistaraheitið í barndómsfelagnum, NSÍ, um vikuskiftið.

Hetta er fyrsta føroyameistaraheitið hjá kvinnunum við Løkin, sum kanska skulu spæla Champions League-fótbólt næsta ár. Tí ivast veteranurin kortini eitt sindur.

 - Nú er tað øgiliga spennandi at hava vunnið, og mann hevur kjans til at vera í Champions League, men akkurát nú er hetta punktum og ein øgiliga góður endi upp á eina góða tíð í fótbóltinum síðstu 30 árini, segði framherjin og legði afturat, at tað kanska er ein 10 prosent kjansur fyri, at hon kortini heldur fram.

Heidi Sevdal er sera fegin um, at tað er eydnast at vinna meistaraheitið í NSÍ. 

 - Tað er ein serlig uppliving, serliga tí tað ikki er hent fyrr, og so tá vit vunnu í EB/Streymi í 2017, og kláraðu at steðga sigursrøðini hjá KÍ, segði Heidi Sevdal.

Heidi Sevdal hevur spælt fleiri hundrað dystir í bestu føroysku deildini fyri GÍ, B36, Víking, HB, EB/Streym/Skála og NSÍ. Harumframt hevur hon skotið 27 mál í 88 landsdystum.