Útlendingar skulu gjalda fyri at brúka bussleiðina

Útlendsk ferðafólk skulu nú gjalda fyri at brúka bussleiðina í Havn.

Tað samtykti Tórshavnar býráð í gjár.

Talan hevur verið um, at fólk, sum ikki búgva í høvuðsstaðarkommununi, eisini skulu rinda, men tað skulu tey ikki.

Higartil hevur skipanin verið tann, at tað kostar einki hjá brúkarum at koyra við bussleiðini.

Tað vil samstundis siga, at tað er kommunan, og harvið skattaborgararnir í Tórshavnar kommunu, sum fíggja kommunalu bussleiðina í høvuðsstaðnum, og sambært roknskapinum hjá kommununi kostaði tað slakar 36 milliónir krónur at reka bussleiðina í fjør.

Útlendingar kunnu keypa trý sløg av ferðaseðlum. Ein 24 tíma ferðaseðil fyri 100 krónur, ein tríggjar daga ferðaseðil fyri 200 krónur, ella ein sjey daga feðaseðil fyri 400 krónur.