Nógvir bilførarar sektaðir

Undan fótbóltsdystinum í Fuglafirði seinnapartin í gjár gjørdi politiið ferðmátingar, og tá koyrdu fimm bilførarar ov skjótt.

Tveir koyrdu so skjótt, at teir fingu treytaða frádøming av koyrikortinum og tríggir fingu klipp í kortið.

Um áttatíðina í gjárkvøldið kostaðu ferðslukanningar við Gøtugjógv eisini bilførarum, tí har fekk ein treytaða frádøming og tríggir klipp í kortið.

Fleiri tiknir í nátt
Og tá ið politiið gjørdi ferðmátingar kaldbaksmegin Kollafjarðartunnilin nakað eftir midnátt, vóru tað tveir, sum gjørdu ov skjótt av.

Annar fekk klipp í koyrikortið, men hin koyrdi 132 kilometrar um tíman, og av tí at hann er ein nýggjur bilførari, fekk hann koyriforboð.

Eisini var ein bilførari steðgaður á Landavegnum í Havn í nátt klokkan fýra, og hann verður skuldsettur fyri rúsdrekkakoyring.

Skuldsettur fyri harðskap
Annars sigur vakthavandi á Politistøðini í Havn, at nógv fólk var í býnum og at politiið tí eisini var úti og patrúljeraði.

Fleiri ferðir var neyðugt at leggja ímillum, tí fólk høvdu fingið ov nógv at drekka.

Og í tí eina førinum var ein persónur í miðbýnum í Havn serliga ólátaður og harðligur, so hann varð tikin fyri og koyrdur í brummuna.

Hann verður skuldsettur fyri harðligan atburð og fær 1500 krónur í bót.