Lóg á veg um eftirgjørdan gitnað

Nú koma reglur um eftirgjørdan gitnað í Føroyum.

Eitt uppskot um ríkislógartilmæli - lógin er donsk - er sent til hoyringar. 

Í løtuni eru ongar lógarreglur um eftirgjørdan gitnað í Føroyum. 

Í okkara grannalondum eru viðurskiftini viðvíkjandi viðgerð móti barnloysi lógarásett. 

Millum annað skal støða takast til, hvørjar treytir skulu setast fyri at kunna fáa tilboð um viðgerð móti barnloysi, og um landið skal fíggja viðgerðina ella part av henni.

Endamálið við uppskotinum er at tryggja rættindi og skyldur, tá brúk er fyri hjálp til at gerast foreldur. 

Tað er umráðandi at tryggja, at øll hava somu atgongd til viðgerð fyri barnloysi, samstundis sum tað er greitt ásett, hvørjar treytir og rættindi eru galdandi í sambandi við viðgerð fyri barnloysið, skrivar Heilsumálaráðið. 

Í lógini verður eisini ásett, nær og undir hvørjum umstøðum, granskast kann í hesum øki.