Venjarin: Vunnu upp á føroyska mátan

 - Tá alt kom til alt, haldi eg, at vit vunnu upp á tann føroyska mátan í dag.

Tað segði ein fegin venjari eftir tepra 1-0 sigurin á Armenia á útivølli. Eyðun Klakstein stóð á odda fyri føroyska A-landsliðnum fyri fyrstu ferð, og hann sá Viljorm Davidsen leggja Føroyar framum 1-0 við brotsparki fyri steðgin.

Armenia leyp á meginpartin av dystinum, meðan Føroyar lógu langt afturi og vardu egnan brotsteig.

Trýstið bara øktist í seinna hálvleiki, men føroyingarnir stóðu sera væl, og tá armenar viðhvørt fingu skot á, tók Teitur Matras Gestsson tað, hann skuldi.

 - Tað bleiv ein øgiliga kaotiskur dystur. Vit høvdu vilja stýrt honum eitt sindur meir, vit høvdu vilja spælt eitt sindur meir, segði Eyðun Klakstein.

Nú gongur leiðin til Norðurmakedónia, har síðsti dysturin í hesi Nations League-kappingin er á skránni.

 - Skulu vit ikki bara taka tann seinna dystin eisini? Eg haldi, at vit fara eftir tí, segði venjarin við einum smíli.