Skattaprosentið í Vági kvinkar niðureftir

Tað verður eitt sindur bíligari at búgva í Vági næsta ár.

Vágs býráð samtykti á býráðsfundi fríggjakvøldið, at næsta ár lækkar skattaprosentið 0,2 prosentstig, úr 21,1 prosentum niður í 20,9 prosent.

Skattalættin kostar umleið hálva millión krónur, sambært kommununi.

Barnafrádrátturin í Vágs Kommunu verður óbroyttur næsta ár, 6250 krónur fyri barnið.

Sambært fíggjarætlanini fyri 2025 verða samlaðu inntøkurnar hjá Vágs Kommunu 78,4 milliónir krónur næsta ár. 

Raksturin kostar 72,9 milliónir, og íløgur skulu gerast fyri seks milliónir krónur. Pengarnir fara millum annað til ábøtur á Vágs skúla, ljós til fótbóltsvøllin, smærri ábøtur á havnaøkinum, spillvatnsætlan og 550.000 krónur skulu brúkast til asfaltering og gongubreyt.

Sambært fundarskránni hjá Vágs Kommunu var fundurin fríggjakvøldið, har fíggjarætlanin fyri 2025 varð endaliga samtykt, hin næstsíðsti hjá sitandi býráð.

Enn hevur býráðið, ið tekur við á nýggjárinum, ikki skipað seg.